БИШКЕК, 2-апр. — Sputnik. Мурдагы билим берүү министри Камилла Шаршекеева тегерек стол учурунда тестирлөөнүн жаңы системасына аз эмес каражат талап кылынса да акчаны аябаш керектигин айтып, ЖРТны иштетүүгө кеткен миллиондогон долларлар акталганын белгиледи.
Ал ошондой эле ЖРТны иштетүүгө билим берүү тармагындагы кырдаал себеп болгон.
"Билим берүү тармагындагы реформаны мен демилгелегем. Реформа тестирлөөнү киргизүү менен башталган. Кыргызстанда мамлекеттик университеттерде бекер окууга 1500 орун бар болчу. Бирок бул орундардын акыйкаттуу бөлүштүрүлүшүнө чоң күмөнүбүз бар эле. Ошондо тестирлөө системасын иштеп чыгуу үчүн Принстонго кайрылганбыз", — деди экс-министр.
"Бүгүнкү күндө ЖРТнын кемчилик жактары өтө эле аз. Жогорку упай алган балдардын ой жүгүртүүсү мыкты экенинен кабар берет. Муну ишке ашыруу үчүн АКШнын бийлигине кайрылганбыз. Дүйнөлүк банктын дагы каражаты кеткен. Бул өтө кымбат иш-чара", — деди Шаршекеева.
Ал ошондой эле окуу жайлардагы сапаттуу билим берүү системасын сактап калуу курч маселеге айланганын белгиледи. Себеби жаңы тестирлөөнүн ишке кириши менен мугалимдер студенттерди билимге сугарбастан тестирлөөгө даярдап калышы мүмкүн.