Элдик эреже боюнча жаш бала жана жаштарга дагы эмнелерди жасоого болбойт? Sputnik Кыргызстан агенттиги этнопедагог Абдыкерим Муратов менен биргеликте тизмектеп көрдү.
Кийимди желбегей жамынбайт. Жашы жете элек балдар кийимди желбегей жамынса анын кесепти элге жана ата-энесине тийип, ата-энесинен эрте ажырап калат деген ишеним жашаган.
Жер таянып отурбайт. "Жер таянып отуруу — жетимдиктин белгиси" деген ишеним жашаган.
Колун артына алып баспайт. Эл арасында "колун артына алып баскан бала жокчулукту, ачарчылыкты чакырат" деген тыюу орун алган.
Колун оозуна албайт. Бул жокчулуктун, ачкачылыктын белгиси деп коюшкан. Ошондой эле бала тизесин кучактап отурса да кийин кембагал болуп калат деген ишеним бар.
Таңдайын такылдатпайт. Таңдайын такылдаткан баланы "ата-энеңди жутуп алба" деп илгеркилер урушкан. Ошондой эле "ата-энеси өлгөндүн белгиси" деп балдарды себепсиз таяк таяндырышкан эмес.
Үшкүрүнбөйт. Ал дагы жамандыктын белгиси катары сыпатталып келет. Бала үшкүрсө улуулар "көйнөгүңдү уй жегир" деп коюш керек.