Ташкенттен келген делегацияны "Өзбектемиржолу" ишканасынын директорунун орун басары Равшан Икрамов жетектеп келди. 77 кишиден турган топтун курамында темир жолдо иштеген кызматкерлер жана ардагерлер бар. Мындан сырткары, жүргүнчүлөр да келишти.
"Жакшы маанайда тосуп алганыңыздарга чоң рахмат! Эки элдин кызматташтыгы мындан ары да илгерилей беришин каалайм. Эми биздин жарандар Кыргызстандын касиеттүү Ысык-Көлүнө келип ден соолугун чыңдап эс алып кете алышат. Бүгүн келген поезд 300 орунга ылайыкташкан. Биз туристтердин санын дагы көбөйтүп 500 орундук вагондор менен каттоого аракет кылабыз. Ошондой эле кыргыз бир туугандарыбызды да Ташкент, андан ары Өзбекстандын эң меймандос Самарканд, Бухара шаарларына чакырабыз", — деди Икрамов.
Ал эми "Кыргызтемиржолу" ишканасынын директору Алмазбек Ногойбаев буга чейин поезд жайкы сезондо гана каттап келгенин белгиледи.
"Өзбектемиржолунун" ардагерлери Магдуба Жораева аткарылып жаткан иштер чоң кубаныч тартуулап жатканын белгилеп өттү.
"Мен 1990-жылдары темир жолдо иштегем. Азыр пенсионермин. Эмгегибиз бааланып ушундай иш-чарага келип отурабыз. Эл башчыларыбызга рахмат! Жол да жакшы экен кыйналбай келип алдык. Мындан артык болбойт", — деди Жораева.
Поезд Бишкектеги станцияда 40 мүнөткө токтоп андан ары Балыкчыга жөнөп кетти.
"Өзбек темир жолдору" ишканасынын жүргүнчү ташыган поезди жумасына бир ирет каттайт. Анда жети купе вагон, үч плацкарт вагон жана бир ресторан вагон бар. Билет баасы плацкарт вагонго 2500 сом, купе вагонго 3378 сом, люкс вагонго 6432 сомду түзөт.
Каттам Ташкенттен Балыкчыга жуманын бейшемби күндөрү жүрө баштайт. Жума күнү Бишкекке келип, андан ары Балыкчыга жөнөп кетет. Ал эми ишемби күнү Балыкчыдан Ташкентке багыт алат.