БИШКЕК, 22-мар. — Sputnik. Өгөй апасы сабап №3 ооруканага түшкөн сегиз жаштагы кыздын өз энеси табылды. Бул тууралуу Sputnik Кыргызстан агенттигине Аламүдүн райондук социалдык өнүктүрүү башкармалыгынын башчысынын орун басары Тилек Миңбаев билдирди.
Анын айтымында, cабалган кыздын өз энеси буга чейин эле табылып, эч кимге билгизбей келип-кетип жүргөн.
"Кыздын апасы 30 жаштарда окшойт, жаш эле экен. Биздин кызматкерлерге биринчи күйөөсү экөөнүн ортосундагы эки баласын тең өзү карап жүргөнүн айтты. Бирок атасы былтыр июнда "кызым мени менен кичине жашай турсун" деп алып кеткен боюнча жашаган жерин жашырып, балдарын бербей жүрүптүр. Келиндин жашоо-шарты орто экенин билдик. Кайрадан турмушка чыгып экинчи жолдошунан да бир баласы бар экен. Кызы сабалып ооруканага түшкөнүн укканда эле энеси ага барып турчу. Бирок кызы коркуп, анын келип жатканын эч кимге айтпаптыр. Азыр өгөй энеси кордогон кыз биздин борбордо реабилитациядан өтүп, психологдор аны менен иштеп жатат. Буюрса, бир жумадан кийин өз энесинин колуна өткөрүп бермекчибиз", — деди Миңбаев.
Маалыматты "Балдар укугун коргоо лигасынын" жетекчиси Назгүл Турдубекова тастыктап, Facebook баракчасына бул боюнча билдирүү жазып, журналисттерден ал аялга жумшагыраак мамиле жасоону өтүнгөн.
Кичинекей кыздын сабалышы боюнча Аламүдүн райондук милициянын кызматкерлери Кылмыш жаза кодексинин 105-беренеси (денеге атайылап залал келтирүү) боюнча кылмыш ишин козгогон. Ошондой эле маселе ИИМдин жашы жете элек балдар инспекциясынын жана Билим берүү министрлигинин кызматкерлери тарабынан түзүлгөн балдар иши боюнча комиссиясында дагы каралмай болгон.