БИШКЕК, 14-мар. — Sputnik. Борбор калаадагы коомдук транспорттун айдоочулары бирдей форма киерин шаардык Транспорт башкармалыгынан билдиришти.
Ага ылайык, айдоочуларга фирманын аты жана Бишкек шаарынын символу түшүрүлгөн күрмө берилет.
Форманы биринчилерден болуп №: 100, 101, 147, 192, 193 маршруттук таксилердин айдоочулары кийди. Ошондой эле троллейбус менен автобустардын айдоочуларына да жыл мезгиле жараша форма берүү каралууда.
"Бишкек шаарындагы жүргүнчү ташыган коомдук транспорттун айдоочуларын тийиштүү форма менен камсыздоо авто ишканалардын жетекчилеринин бардыгына тапшырылды", — деп айтылат маалыматта.
Андан сырткары айдоочулардын тышкы көрүнүшүн көзөмөлгө алуу тапшырылды. Ага ылайык, кийимдер консервативдик-классикалык түрдө болушу кажет жана ишке спорттук күрмөчөн жана спорттук бут кийимчен чыгууга жол берилбейт.