ОШ, 12-мар. — Sputnik. Ошто 6-класста окуган уулунун өлүмүнө шектелип камакка алынган атага карата козголгон кылмыш иши кыскартылып, камактан бошотулду. Бул тууралуу Ош облустук сотунун маалымат катчысы Бекзат Осмонкулов Sputnik Кыргызстан агенттигине билдирди.
Осмонкуловдун айтымында, Ош шаардык соту Кылмыш жаза кодексинин 101-беренеси (байкабастыктан өлүмгө дуушар кылуу) менен айыпталган Ю.К. аттуу жарандын ишин жабырлануучунун мыйзамдуу өкүлү айыптоодон баш тарткандыгына байланыштуу өндүрүштөн кыскарткан.
"Соттук отурумда каза болгон баланын апасы, башкача айтканда, соттолуучунун жубайы жолдошуна карата эч кандай арыз-доосу жок экендигин жана аны айыптоодон баш тарта тургандыгын айтып, тосмо арыз берген. Бул жөнүндө соттолуучунун жактоочусу тарабынан өтүнүч келтирилген. Өз кезегинде мамлекеттик айыптоочу дагы келтирилген өтүнүчкө каршы эместигин билдирген. Ошол себептен Жаза процессуалдык кодексинин 28-беренесине ылайык, Ош шаардык соту айыпталуучуга карата кылмыш ишти сот өндүрүшүнөн кыскарткан", — деди ал.
Ал ошондой эле бул токтом акыркы эмес экенин, нараазы тарап аппеляциялык тартипте Ош облустук сотуна даттанууга укуктуу экендигин кошумчалады.