БИШКЕК, 12-мар. — Sputnik. Түндүк Кореянын лидери Ким Чен Ын АКШ менен тынчтык келишимине кол коюп, дипломатиялык байланышты түзүүгө ынтызар экенин Түштүк Кореянын "Тона ильбо" басылмасы жогорку кызмат адамдарына таянуу менен билдирди.
Түндүк Кореянын лидери АКШ менен болгон мамилени жөнгө салууга кызыкдар экенин Түштүк Кореянын делегациясы менен Пхеньяндагы жолугушууда айткан.
Ким Чен Ын буга чейин Дональд Трамп менен жолугууга макул экени маалымдалган болчу. Расмий Вашингтон дагы макул экенин, качан жана кайсы жерде жолуга турганы кийин кошумча билдириле турганын айткан.