БИШКЕК, 9-мар. — Sputnik. Өзбекстандын президенти Шавкат Мирзиёев Тажикстанга биринчи жолу мамлекеттик сапары менен барганын Sputnik Өзбекстан маалымат агенттиги жазды. https://ru.sputniknews-uz.com/politics/20180309/7674535/Mirzieev-Dushanbe.html
Тажик лидери Эмомали Рахмон кесиптеши Мирзиёевди өкмөт мүчөлөрү жана Ардак кароол менен Душанбе шаарындагы эл аралык аэропорттон тосуп алды.
Мамлекет башчылары тар чөйрөдө жана кеңейтилген форматта жолугушууларды өткөрдү.
Бул Мирзиёевдин Тажикстанга болгон алгачкы сапары. Өзбекстандын мурдагы президенти Ислам Каримов расмий сапары менен акыркы жолу 2000-жылы июнда барган. Ал эми Эмомали Рахмон Ташкентке 1998-жылы мамлекеттик иш-чаранын алкагында келип кеткен.
9-10-мартта болгон жолугушуунун жыйынтыгында президенттер чогуу билдирүү жасаары пландалган. Жалпысынан 25тен ашык документке кол коюлат.
Ошондой эле бизнес-форум жана Өзбекстандын улуттук өнөр-жайы тууралуу көргөзмө уюштурулат.