25 миллион насыянын 7 миллиону талаага кетип жатат. Бул тууралуу Алтынбек Сулайманов парламенттик жыйында сүйлөп жатып билдирди.
Эске сала кетсек, Жогорку Кеңештин жыйынында "2017-жылдын 21-августунда Бишкек шаарында кол коюлган Кыргыз Республикасы менен Айыл чарбаны өнүктүрүү эл аралык фондунун ортосундагы "Рынокторго чыгууну камсыздоо" долбоорун каржылоо жөнүндө макулдашууну ратификациялоо тууралуу" мыйзам долбоору 2-окууда каралып, кызуу талкуудан кийин колдоо тапты.
"Менин түшүнгөнүм боюнча грантты кошуп 25 миллион насыя алып жатабыз. Ал сумма 40 долбоорго бөлүнөт. 25 миллондун 17 миллиону элге жетсе, 7 миллиону сол чөнтөккө кетиши мүмкүн. Бул нерсе күмөн санатат. Жаш балдар үчүн бөлүп беребиз деп жатышат, ушул нерсени карап чыккыла!" — деди Сулайманов.
Депутат мындай башаламан иштерди токтотууну кошумчалады.