БИШКЕК, 7-мар. — Sputnik. Борбор калаада өкмөт башчы Сапар Исаков менен Бишкек мэри Албек Ибраимов 8-март майрамына карата аялдарды куттуктады.
Иш-чара Токтогул Сатылганов атындагы кыргыз улуттук филармониясында өттү.
"Жашоонун бардык чөйрөлөрүндө маанилүү ролго ээ болуп, апаларыбыз ар кандай кырдаалга карабастан өз элинин татыктуу уулдарын – мамлекеттик улуу ишкерлерди, аскер башчыларын, министрлерди, окумуштууларды тарбиялып келишкен. Бул баарыбыз үчүн сыймык", — деди Исаков.
Өкмөт башчы улуттук филармониянын залында куттуктоо сөзүн айтып жатып, өз энесинин мээримин эстеп, өзүнүн төрт кызына да ошондой мамиле жасоого аракет кыларын айтты.
Ал эми Бишкектин мэри Албек Ибраимов аялдарды куттуктап, алардын Бишкек шаарынын өнүгүшүндө кошкон салымын белгиледи.
Бүгүн Кыргызстан дүйнөнүн башка мамлекеттери сыяктуу эле 8-март аялдардын эл аралык майрамын белгилеп жатат. Ал эми 8-марттагы аба ырайы тууралуу Кыргызгидромет айрым жерлерде жамгыр жаап, тоолуу райондорго кар түшүшү мүмкүдүгүн билдирди.