БИШКЕК, 6-мар. — Sputnik. Sputnik Кыргызстан маалымат агенттиги жана радиосунун улук корреспонденти Нургүл Максутова Кыргыз-түрк "Манас" университетинин коммуникация факультетинин студенттери менен жолукту.
Ал студенттерге редакциянын ишмердиги, өзгөчөлүгү тууралуу айтып берди. Андан сырткары, агенттиктин "Айылга кат", "Фактылар", "Тест", "Болбойт" рубрикаларынын уникалдуулугуна токтолду. Редакциянын ири долбоорлору "Сынган кылыч" менен "Ажайып Кыргызстан" тууралуу да айтып берди.
"Sputnik Кыргызстан агенттигинин ишине катардагы эле окурмандар эмес профессионал журналисттер, өзгөчө жогорку окуу жайлардын студенттеринин кызыгышы ичиңди жылытат. Биздин агенттик жаштар менен иштешүүнү маанилүү деп эсептейт. Жаштарды чакырып, тажрыйба менен бөлүшкөнгө дайым даярбыз. Студенттер окуп жүргөндө эле келечектеги кесибин ичинен таанып-билгени маанилүү", — деди Максутова.
Sputnik Кыргызстан маалымат агенттиги жана радиосу 2014-жылдын декабрынан тарта ишин баштаган. Өз окурмандары, угармандары жана көрөрмандарына 24 саат бою кыргыз, орус тилдеринде маалыматтарды жеткирип турат.
Sputnik Кыргызстан ондогон мамлекетте мультимедиалык маалымат хабына ээ эл аралык маалымат агенттиги жана радиосунун бир бөлүмү болуп саналат.
Sputnik 30дан ашык тилде маалымат таратат.