БИШКЕК, 6-мар. — Sputnik. Мамлекеттик коргоо комитети менен "Аскер-курулуш" мамлекеттик мекемесинин кызматкерлерине Кылмыш жаза кодексинин бир нече беренелери боюнча кылмыш иши козголду. Бул тууралуу Башкы прокуратуранын маалымат кызматынан кабарлашты.
"Кыргызстандын Куралдуу күчтөрү үчүн үй куруп жана имараттарды оңдоп жаткан "Аскер Курулуш" мекемеси курулуш материалдарына кеткен чыгымдарды негизсиз түрдө жогорулатып, тендерди мыйзамдарды бузуу менен өткөргөн", — деп айтылат маалыматта.
Аталган факты боюнча Кылмыш жаза кодексинин 304-беренеси (кызматтык абалын кыянаттык менен пайдалануу), 306-беренеси (тендерди Кыргызстандын кызыкчылыктарын эске албастан өткөрүү) жана 308-беренеси (бюджеттин каражатын мыйзамсыз колдонуу) боюнча кылмыш иши козголду.