БИШКЕК, 5-мар. — Sputnik. Президент Сооронбай Жээнбеков бүгүн, 5-мартта, Мамлекеттик чек ара кызматынын төрагасы Уларбек Шаршеев менен өкмөттүн чек араны делимитациялоо маселелери боюнча атайын өкүлү Курбанбай Искандаровду кабыл алды. Бул тууралуу өлкө башчынын маалымат кызматы билдирди.
Жээнбеков анын Өзбекстан жана Тажикстанга болгон иш сапарларынын натыйжасында жетишилген макулдашууларга ылайык, кыргыз-тажик жана кыргыз-өзбек чек арасынын калган участкаларын делимитациялоо жумуштарын тездетүү боюнча бардык чараларды көрүүгө тапшырма берди.
Искандаров кыргыз-өзбек чек арасынын калган участкаларын аныктоо боюнча жумуштар ыкчам жүрүп жатканын, 2018-жылдын экинчи кварталында Кыргызстан жана Тажикстандын ортосундагы эки тараптуу маселелерди комплекстүү карап чыгуу үчүн өкмөттөр аралык комиссиянын жолугушуусу белгиленгенин айтты.
Президент мамлекеттик чек аранын участкаларындагы өткөрүү пунктуларынан өтүү үчүн жагымдуу шарттарды түзүү зарылдыгын белгиледи.
Жолугушууга ошондой эле президент аппаратынын жетекчисинин орун басары Алмамбет Салиев, Коопсуздук кеңешинин катчысынын биринчи орун басары Дамир Сагынбаев, президенттин кеңешчиси Жеңиш Раззаков катышты.