БИШКЕК, 4-мар. — Sputnik. Кечээ, Токмок шаарына жакын жерде болгон жол кырсыгынан каза болгон келин ырчы Замир Арыкбаевдин бир тууган эжеси болуп чыкты. Бул тууралуу Sputnik Кыргызстан агенттигине аткаруучунун тууганы кабарлады.
Андан соң каза болгон адамдар бир үй-бүлө мүчөлөрү экени айтылып, 60 жаштагы чоң ата, чоң апасы, келини жана 3 жаштагы небереси болуп Бишкектен Каракол шаарына үйлөнүү тойго бара жатышкандыгы маалым болгон.
Анын айтымында, келиндин артында төрт кызы калды.
"Ырчы Замир Арыкбаевдин эжеси Айнура Арыкбаева 41 жашта болчу. Ат-Башыга келин болуп барганына 11 жылдай болуп калган, бирок Бишкекте эле турушчу. Кыздарынын улуусу 4-класс болсо кичүүсү 3 жашка чыга элек", — деди келиндин тууганы.
Ал ошондой эле кырсыкта каза болгон кичинекей наристе келиндин кызы эмес, кайын сиңдиси экенин да кошумчалады.
Замир Арыкбаев эл оозуна "Кудача кыз" аттуу ыры менен алынган ырчы. Ошондой эле "Даткайым", "Кыздар ай", "Арноо" аттуу чыгармалары менен көпчүлүккө белгилүү.