Кыргыз-казак чек арасында зыянга учурагандардын чыгымы төлөнгөн жок. Бул тууралуу Талантбек Маткерим уулу Sputnik Кыргызстан радиосуна маек куруп жатып билдирди.
Анын айтымында, мындай окуя кайталанбайт деп эч ким кепилдик бере албайт.
"Күзүндө Казакстандын чек арасы көзөмөлдү күчөткөндө эң көп зыянды жүк ташуучулар тартты. Канча күндөп товарлары туруп калды. Бирок чыгымдын эч бири төлөнгөн жок. Аркасынан бир стакан муздак суу ичишти да, ишти уланталы деп жөнөп кетти. Чыгымдардын статистикасын тактоого да мүмкүн болбоду. Анткени өзгөчө кырдаалдар болгондо гана экинчи тарап жагдайды эске алмак. Бизде болсо жетекчилердин пикир келишпестиги болуп калды", — деди Маткерим уулу.
Ал жүк ташуучуларга өкмөт жакшылап көңүл буруусу керектигин кошумчалады.
Эске сала кетсек, өткөн жылдын 10-октябрында кыргыз-казак чек арасында көзөмөл күчөтүлүп, бир топ көйгөй жаралган. Мамлекеттик чек арадагы абалдын жөнгө салынышы менен 4-декабрь күнү тигилген чатырлар жыйналып, бардык жабдуулар кампага алып келинген.