Рулда бара жатып видео көргөн маршрутканын айдоочусу эскертүү алып, Административдик кодекстин 239-беренесине ылайык 200 сом өлчөмүндө айыпка жыгылды. Бул тууралуу Жол кыймылы коопсуздугун камсыздоо башкы башкармалыгынын (ЖКККББ) маалымат кызматынан билдиришти.
"Жол эрежесин бузган айдоочуну издөө менен ЖКККБдин техникалык бөлүмүнүн жетекчиси Белек Алымов алектенди. Айдоочу бул кылганы үчүн өкүнүп жатканын айтып, экинчи мындай көрүнүш кайталанбайт деп сөз берди", — деп айтылат билдирүүдө.
Эске салсак, 16-февраль күнү кечки саат жетилер чамасында №204 маршрутканын айдоочусу жүргүнчүлөрдүн нааразы болгонуна карабай, рулда бара жатып, бир нече мүнөт бою планшеттен видео көргөн.
Ал эми айдоочу Sputnik Кыргызстан агенттигинин кабарчысына планшетти жанындагы агасынын кызы видео көрөм дегенинен иштетип койгонун айткан.