БИШКЕК, 19-фев. — Sputnik. Күйүүчү май ташыган Reno үлгүсүндөгү унаа "Чычкан" суусуна кулап толугу менен күйүп кетти. Бул тууралуу ӨКМден кабарлашты.
Билдирмеге караганда, окуя Бишкек — Ош унаа жолунун 238-чакырымында 19-февраль күнү саат 11:00дө болгон.
"Айдоочу рулду башкара албай калгандыктан унаа "Чычкан" суусуна түшүп толугу менен күйүп кеткен. Кырсыктын кесепетинен эки адам жабыркап Токтогул райондук ооруканасына жеткирилген. Унаада 35 тонна бензин болгон", — деп айтылат маалыматта.
Кырсык болгон жерге Токтогул райондук №97 Өрт-куткаруу бөлүмүнүн 5 куткаруучусу тартылган.