БИШКЕК, 12-фев. — Sputnik. Түндүк Кореядан Олимпиада оюндарына келген күйөрмандар өз командасын өзгөчө ыкма менен сүрөп, башкалардын таң калтырганын Washington Post басылмасы билдирди.
Маалыматка ылайык, команданы колдоо үчүн өкмөт тарабынан чирлидер-кыздар атайын тандалган. Трибунадан алар мурдатан даярдалган музыкалык-хореографиялык номерлерди аткарып, элдин көңүлүн бурушкан.
Басылма Түндүк Корея дал ушундай жол менен "өзүнүн күчүн, ишенимдүүлүгүн жана режимдин туруктуулугун" далилдегиси келип жатат деп белгиледи.
Чирлидер-кыздардын видеосу социалдык тармакта тездик менен жайылууда. Окшош кызыл кийим кийген кыздар ырларды чогуу аткарып, аны кол чабуу жана бий менен коштогон.
Ал эми кыска-трек таймашында кыздар хор ырдап залдагылардын көңүлүн бурган.
Чирлидер-кыздар командасы утулуп калганына карабай аларды сүрөп турушту. Кыздар арасындагы хоккей боюнча мелдеште Швейцарияга 0:8 эсебинде утулуп калганына карабай спортчуларга колдоо көрсөтүшкөн. Алар "Бирдиктүү Корея", "Алдыга, жеңишке жетебиз!" деп кыйкыруудан чарчаган эмес.
Кыздар керек болсо муз аянтачасында эч ким жок болгон учурда да ырдаганы айтылат.
Бул Олимпиадага келген элди таң калтырган биринчи учур эмес. Оюндун ачылышында кыргызстандык спортчулардын ак калпагы да көпчүлүктү тамшанткан.