БИШКЕК, 12-фев. — Sputnik. Бишкектеги Байтик баатыр менен Түштүк магистралдын кесилишинде көчө шыпырып жүргөн адамды машина коюп кеткенин күбө Sputnik Кыргызстан агенттигине билдирди. Анын айтымында, кырсык дүйшөмбү күнү эртең менен саат 7:30дар чамасында болгон.
"Катуу келе жаткан машина жолдун четин шыпырып жүргөн аялды коюп кетти. Ал кызгылт сары күрмө кийип жүргөн", — деди күбө.
"Honda Elysion автоунаасын айдап бараткан 44 жаштагы тургун Түштүк магистраль менен чыгышты көздөй кетип баратып, 60 жаштагы аялды коюп кеткен. Айдоочу мас эместигин наркологиялык кароо тастыктады", — деп милициядан билдиришти.
Милициянын маалыматына ылайык, аял тез жардам унаасы менен ооруканага баратканда жолдон үзүлгөн. Автоунаа атайын короого токтотулуп, тергөө жүрүүдө.