БИШКЕК, 12-фев. — Sputnik. Кыргызстандын Россиядагы элчилигинин командасы Подмосковьедеги мини-футбол боюнча XVIII кышкы дипломатиялык оюндарынын турниринде биринчи орунду алып жеңүүчү аталды. Бул тууралуу дипломатиялык өкүлчүлүктүн маалымат кызматынан кабарлашты.
Оюндарга 20 мамлекеттен 20дан ашык команда катышкан. Спорттун алты түрү боюнча белектер ойнотулган (биатлон, хоккей, лыжа, теннис, бильярд жана мини-футбол).
Футбол тааласында Куба, Молдова, Түндүк Корея жана Азербайжан командалары менен беттешкен кыргызстандык дипломаттар бардыгын жеңип, чемпион аталышты. Уюштуруучулар кубокту тапшырып жатып көп жылдардан бери биринчи жолу КР элчилиги жеңишке жетип жатканын белгилешкен.