БИШКЕК, 7-фев. — Sputnik. Экстремисттик иш-аракеттери үчүн издөөдө жүргөн чет элдик жаран Кыргызстанга кирип келе жаткан жеринен кармалганын Улуттук коопсуздук боюнча мамлекеттик комитеттен билдиришти.
Маалыматка караганда 40 жаштагы Б.Д. аттуу чет элдик жаран 2-февралда чек арадан колго түшүрүлгөн.
Кармалган кишинин эмиссарлардын буйругу менен куралдуу жихад уюштуруу жолу менен коомдук-саясий кырдаалды бузуу максатында КМШ өлкөлөрүнүн биринин аймагында деструктивдик-саясий жана террордук топторду түзүү менен алектенип жүргөнү аныкталды.
Азыркы учурда дагы ыкчам-издөө иш-аракеттери уланып жатат.
Буга чейин да УКМК кызматкерлери Сирия жана Ирактын аймагында согушкерлердин курамында болуп келген КМШ өлкөлөрүнүн үч жаранын колго түшүргөн.