Кийин беш жаштагы Муртаза Ахмади футболчу Месси менен жолугуп белекке анын кол тамгасы коюлган футболкага ээ болгон.
Муртаза Sputnik агенттигине берген маегинде мындай белекке аябай кубанып жатканын, бирок футбол легендасы менен көрүшкүсү келерин айтып берген. Месси өзүнүн афган күйөрманын унутуп калбастан "Барселона" командасы Катар менен ойноо үчүн келгенде Муртаза менен Доха шаарында жолуккан.
Sputnik Афганистан кичинекей "Месси" бүгүн кандай жашап жатканына жана футболго болгон кызыгуусу дагы деле күчпү деген суроолорго жооп издеп көрдү.
Учурда Муртаза 7 жашта. Ал Афганистандын Жагури уездинин Газни провинциясында жашайт. Жеткинчектин атасы Мохаммад Ареф Ахмади баласы Мессини биринчи жолу телевизордон көрүп, ошондон бери анын фанатына айланганын айтып берген. Муртаза кумириникиндей футболка кийип топ тепкенди кыялданчу.
"Балам күнүгө Мессиникиндей футболка сатып бер деп сурана берчү. Бирок жергиликтүү базарга барып андай таппай койгом", — деди баланын атасы.
Ошондо Муртаза агасына ак жана көк чийиндери бар желим пакетти берип сүйүктүү футболчусунун атын жаздырып алган.
"Балам жөнөкөй желим пакетке ушунча сүйүнөт деп ойлогон эмесмин", — деди Мохаммад Ареф.
"Месси баламды кучактап, колунан кармап алып футбол талаасына алып чыкканда көзүмө жаш алдым", — деп Муртазанын атасы эскерди.
Бирок кичинекей футболчунун жашоосунда кайгылуу да окуялар болгон. Месси менен жолуккандан кийин анын үй-бүлөсүнө коркутуулар боло баштаган.
"Мындан улам биз Жагурини таштап Пакистанга көчүүгө аргасыз болдук", — деди баланын атасы.
Бирок бөтөн жерде эки жыл кыйналып жашагандан кийин өз мекенине кайтууга аргасыз болушкан. Учурда Ареф төрт уулу, төрт кызы менен кичи мекенинде жашап келет. Балдары мектепке бара албаганы аны түйшөлтүп жатканын билдирген. Ал эми кичинекей "Месси" достору менен футбол ойноо менен алек. Ал келечекте тажрыйбалуу футболчу катары афган улуттук курамасы үчүн ойногусу келет.