БИШКЕК, 31-янв. — Sputnik. "Улуттук энергетикалык холдинг" компаниясынын төрагасы Айбек Калиев Бишкек ТЭЦиндеги авариядан кийин иштен кетүүнү каалаганын премьер-министр Сапар Исаков Жогорку Кеңештин жыйынында билдирди.
Депутат Руслан Казакбаев министрлер кабинетинен кимдир бирөө отставкага кетүү боюнча арыз берген-бербегенин сураган.
"Бир эле адам арыз берди. Ал азыр бул жерде отурган "Улуттук энергетикалык холдингдин" төрагасы Айбек Калиев. Бирок мен анын рапортун кабыл алган жокмун. Ал убайым тартып күнү-түнү объектиде жүргөнүн көрүп жатам. Албетте Калиевдин дагы күнөөсү бар, бирок арыз менен ушул эле адам кайрылды", — деди Исаков.
Жогорку Кеңештеги ТЭЦ чыры боюнча жыйындын тексттик трансляциясын Sputnik Кыргызстан агенттигинен окуп, түз алып берүүдөн жыйынды көрө аласыздар.