БИШКЕК, 30-янв. — Sputnik. Өзгөчө кырдаалдар министрлигинин 30-январга берген маалыматы боюнча өлкө аймагында бир суткада 34 өрт кырсыгы катталып, аны өчүрүүгө 38 бөлүм тартылган.
Катуу сууктан улам тургундар турак жайын түрдүү ыкма менен жылытууга аргасыз. Айрымдар колго жасалган жылыткычтарды дагы пайдаланышат. Андыктан өрт кырсыгынын алдын алуу боюнча Өзгөчө кырдаалдар министрлиги тараткан эрежелерди сунуштайбыз.
— Имараттын күйүүчү бөлүктөрүнүн кесилишинде (полу, дубалдары, шыбы ж.б.) меш жана мордун ортосу ички бетинен 38 сантиметр турган күйбөөчү материал коюлушу керек. Мешти орнотууда өрт техникалык коопсуздук боюнча күбөлүгү бар усталарды чакыруу зарыл. Меш жана морлорду өз убагында оңдоп-түзөө керек. От жагылган мезгилде эки айдын ичинде жок дегенде бир жолу морлорду тазалоо кажет.
— Мешти ашыкча ысытып жана анын жанына эмеректерди, башка күйүүчү заттарды койбош керек;
— Ашканадагы газ плиталарды, күйүп турган мештерди, электр приборлорун, примустарды кароосуз калтырыбоо керек;
— Күйүп турган примустарды жана керогаздарды жыгач менен капталган тамбурларга, кампаларга жана сарайларга орнотуп колдонууга болбойт;
— Электр чубалгыларынын эскирген бөлүгүн өз убагында алмаштыруу жана оң абалда колдонуу зарыл;
— Колго жасалган электр коргонучтарын (предохранители) колдонбогула, заводдон даярдалганын пайдалануу оң;
— Электр жылыткычтарды (плиткалар, үтүк) күйбөөчү койгучтарга орноткула;
— Үйдүн шыбына жана жер төлөлөрдө, кампаларда жана сарайларда тамеки чегүүгө жол бербегиле, жарык берүүгө ачык шамдарды пайдаланууга болбойт. Анын ордуна фонарик колдонгон жакшы;
— Тоңуп калган суу, канализация, жылуутучу түтүктөрдү ачык от менен эрүүтүгө болбойт. Аларды ысык суу менен эритүү зарыл;
— Үйдүн шыбына жана жер төлөлөргө күйүүчү материалдарды жана таштандыларды сактоого болбойт;
— Короону дайым таза сактагыла;
— Бузук электр орнотмолорун (розеткаларды, вилкаларын, өчүргүчтөрдү) колдонбогула;
— Колго жасалган жылытуучу электр приборлорун пайдаланбагыла;
— Балдарды кароосуз калтырбагыла;
— Күйүп турган тиричилик электр буюмдарын, радио, телеаппаратураларын, газ плиталарын кароосуз таштабагыла;
Өрт коопсуздугунун көрсөтүлгөн пункттарын сактагыла. Муну менен Сиз өзүңүздүн турак жайыңызды, мүлкүңүздү сактоо менен өрт учурунда адамдардын жаракат алуусунун жана каза болуусунун алдын аласыз.
Өрт чыккан учурда тезинен 112, 101 куткаруу кызматтарына чалгыла.