БИШКЕК, 29-янв. — Sputnik. Премьер-министр Сапар Исаков ТЭЦтеги түзүлгөн кырдаал боюнча калаа тургундарына кайрылуу жасады. Бул тууралуу өкмөттүн маалымат кызматы кабарлады.
Премьер калаа тургундарынан кечирим сурады.
"Түзүлгөн кырдаал үчүн баарыңыздардан кечирим сурайм жана актангым келбейт. Абал тыкыр иликтөөгө алынат. Бардык күнөөлүү кызматкерлер ээлеген кызматына карабастан жазаланат. Бүгүнкү күндө шаар тургундары үйлөрүн жылытууда электр энергиясын өтө көп керектеп жатышат. Ошонун натыйжасында Бишкек жылуулук тармагына күч келип, анын иши үзгүлтүккө учурады", — деп жазылат өкмөт башчынын кайрылуусунда.
Ошондой эле ал Бишкек жылуулук электр борбору учурдагы абалды жөнгө салууга жетишкенин айтып, эгерде реконструкцияларды жүргүзбөгөндө мындай суукта шаар ичиндеги бардык суу түтүктөрү толугу менен жарылып, иштен чыкмактыгын баса белгилеп кетти.
Сөз соңунда Исаков калаа тургундарын сабырдуулугу үчүн ыраазычылыгын билдирип кеткен.
Эскерте кетсек, 26-январь күнү кечинде ТЭЦте авария болуп, кубаттуулугу эки эсе төмөндөп кеткен. Бир күндөн кийин өкмөт көйгөй чечилгенин айтканы менен жылуулук берүү калыбына келген эмес. 29-январь күнү дагы бир түтүктөн жарака кеткени белгилүү болгон.