Бишкек ТЭЦинде болгон авариянын себептерин жана аны калыбына келтирүү иштери боюнча Улуттук энергохолдингдин төрагасы Айбек Калиев премьер-министрге маалымат берди. Бул тууралуу өкмөт башчынын басма сөз кызматынан билдиришти.
"ТЭЦтин модернизациядан өткөн жаңы бөлүгү штаттык режимде иштеп жатат. Дал ушул блоктун күчү менен станция жүк көтөрүп берди. Алар болбосо жылуулук тармактары толугу менен иштен чыгып калмак. Авариялык кырдаал эски буу казандарына суу берген куурда түзүлгөн", — деп түшүндүрдү Калиев.
Анын айтымында, жакынкы күндөрдүн ичинде "Бишкек жылуулук тармактары" ишканасынын абоненттерине жылуулук толугу менен жеткирилет.
"ТЭЦ адистери суунун тептературасын акырындык менен көтөрүшөт. Ошентип отуруп дүйшөмбү күнү шаар толугу менен кайрадан жылуулук менен камсыз болот", — деди ал.
Эске салсак, 26-январда кечки саат 18:00дө Бишкек ТЭЦинин эски буу казандарына суу берген куур иштен чыгып, кубаттуулугу 340тан 154 мегаваттка чейин азайтылган болчу.