БИШКЕК, 26-янв. — Sputnik. Кыргызстанда учурда болжол менен 1 миллион калк ичүүчү таза суу менен камсыз болгон эмес. Республика аймагындагы 1805 айылдын 396сында суу түтүктөрү таптакыр жок. Бул туурасында Акыйкатчы институтунун Кыргызстандагы ичүүчү суунун азыркы абалы жана санитариясы боюнча докладында айтылган.
"Кыргызстандагы 1805 айыл-кыштактын ичинен 725инин (38 пайызы) борборлошкон суу системасына кошулууга толук мүмкүнчүлүгү жок, 400дөн ашуун (22 пайыз) айылда таптакыр эле суу түтүк тарамы жок болгондуктан, булактардан суу алууга аргасыз. Ал эми 267 (14 пайыз) калктуу пункт өткөн кылымдагы, 1960-жылдары курулган эски суу түтүктөрдү колдонуп келишет", — деп айтылган.
Доклад байкоолордун жана Кыргызстандагы бардык аймактын жашоочулары катышкан сурамжылоонун жыйынтыгынын негизинде даярдалган.