БИШКЕК, 25-янв. — Sputnik. Бүгүн россиялык UFC мушкери Хабиб Нурмагомедовдун атасы Абдулманап Нурмагомедов Ош шаарына келди. Бул тууралуу Ош шаардык спорт комитети билдирди.
Аны аэропорттон спорт комитетинин өкүлдөрү жана спортчулар чепкен жаап, калпак кийгизип тосуп алышты.
Хабибдин атасы эс алуудан кийин Ош шаарындагы спорт клубдардын биринде машыктыруучулар жана спортчулар үчүн мастер-класс өткөрө турганын айтты.
Абдулманап Нурмагомедов — эркин күрөш боюнча СССРдин спорт чебери, Россиянын эмгек сиңирген машыктыруучусу, Дагестандын самбо боюнча курама командасынын машыктыруучусу.
Эске сала кетсек, белгилүү мушкер Хабиб жана анын атасы Абдулманап Нурмагомедов Бишкек шаарына 23-январда келген.
Кечээ, 24-январда Хабиб Нурмагомедов Бишкектеги соода борборлорунун биринде күйөрмандары менен жолугушуу өткөргөн. Аны менен жолугууга миңдеген адамдар чогулду.