БИШКЕК, 22-янв. — Sputnik. "Гараж 312" түнкү клубунда баңгизатын колдонууга үндөө болгон. Бул тууралуу ИИМдин маалымат кызматы билдирди.
Ага ылайык, клубдун арт-алып баруучусу клубга келгендерди спирт ичимдиктерин жана баңгизатын колдонууга үгүттөгөн. Андан сырткары, сатып алынган баңгизатын ажатканада колдонууга уруксат берилген.
"1988-жылы туулган М.М. аттуу жаран баңгизатын сатууга клубдагы кесиптештерин дагы тарткан", — деп айтылат маалыматта.
ИИМдин билдиришинче, атайын операциянын жыйынтыгында клубдун беш кызматкери кармалган. Арасында түнкү клубдун ээси, арт-алып баруучу, официант жана эки бармен бар. Тинтүү учурунда алардын жанынан баңгизаттар табылган. Ошондой эле клубдун ичинен баңгизаттарын колдонууга ыңгайлашкан бир топ буюмдар алынган.
Баңгизатын колдонгон деген шек менен 32 киши республикалык наркология борборуна алып келинип, төрт кишинин баңгизат колдонгону аныкталган.
Учурда бул кылмышка тиешеси бар башка адамдарды издөө уланууда.