БИШКЕК, 22-янв. — Sputnik. Борбор калаадагы "Гараж 312" түнкү клубунда болгон атайын операциянын видео үзүндүлөрү интернетке жарыяланды. Аны Жазика Туратбекова аттуу колдонуучу Facebook баракчасына жарыялады. Анда бийлей турчу аянтчада атайын даярдыктагы беткапчан аскерлерди көрүүгө болот.
ИИМдин баңгизаттын мыйзамсыз сатылышына каршы күрөшүү кызматынын өкүлдөрү 21-январдын түнүндө клубга басып кирген. Sputnik Кыргызстан агенттигинин ИИМдеги ишенимдүү булагынын билдиришинче, атайын даярдыктагы аскерлер 50дөн ашык кишини кармаган. Арасында 15 кыз бар. Милиция имараттан түрдүү баңзизаттарды тапкан. Алдын ала маалымат боюнча баңгизатты диджей алып келип турган.
Учурда шектелген кишилердин саны 5-6 кишиге чейин азайды.
"Атайын операция учурунда эч ким каршылык көрсөткөн эмес. Клубдан нашаа, синтетикалык баңгизат жана башка заттар табылган. Экспертиза алардын курамын аныктайт", — деп ишенимдүү булак билдирди.
ИИМдин маалымат кызматы атайын операция болгонун тастыктап, анын чоо-жайын кийинчерээк билдирерин айтты.
Клубдун администрациясынан түшүндүрмө алууга мүмкүн болгон жок.