БИШКЕК, 17-янв. — Sputnik. Кыргызстан ЮНЕСКОнун бүткүл дүйнөлүк мурастар тизмесине кирген шаар чалдыбарларды музей катары сактап калуу үчүн Япониядан кол кабыш кылууну суранды. Бул тууралуу Тышкы иштер министрлигинин маалымат кызматы билдирди.
16-январда тышкы иштер министринин биринчи орун басары Динара Кемелова Япониянын Кыргызстандагы элчиси Ёсихиро Ямамура менен жолуккан.
Сөз Чүй облусунун Красная речка айылындагы Невакат жана Ак-Бешимдеги Суяб шаар чалдыбарлары тууралуу болууда. Шаар урандыларын музей катары сактап калуу туристтерди тартууга өбөлгө болору баса белгиленди.
Кемелова адамзаттын тарыхый-маданий мурастарын коргоо жана сактоо багытында ЮНЕСКОнун алкагында кызматташууну өнүктүрүү керектигин белгиледи.
Жолугушууда тараптар Кыргызстан менен Япониянын кызматташтыгын эл аралык уюмдун алкагында чыңдоо маселелерин талкуулашты.