БИШКЕК, 16-янв. — Sputnik. Россиялык кондитер Ренат Агзамов Instagram баракчасындагы түз эфир учурунда Казакстанда талкууланып жаткан торттун баасы тууралуу пикир айтты. Бул тууралуу Sputnik Казакстан агенттиги жазып чыкты.
Айрым ЖМКлар анын баасы 179 миң доллар экенин жазып чыкты.
Агзамов бир нече күндүн ичинде торттун баасы тууралуу ар кандай маалыматтарды окуп чыкканын билдирген.
"Элдин оозун ачырыш үчүн эле ар кандай маалыматтарды жазып жатышат. Анча болду журналисттер тортту 3 миллион, 5 миллион, 10 миллион доллар деп деле жазышса болмок. Келгиле, элди таң калтырыш үчүн андан да чоң суммаларды көрсөтөлү", — деди кондитер.
Анткен менен Агзамов өзгөчө торттун нагыз баасын атоодон баш тартты.
"Анын чыныгы баасын той ээси менен мен гана билем. Эгер төлөп беришсе 10 эсе көп каражатты деле жыргап эле ала бермекмин. Мисалы 10 миллион евро, сонун да", — деди Агзамов.
Торттун диаметри — 3 метр, бийиктиги — 4,2 метр (арабасы менен). Салмагы 1500 килограммды түзгөн.