Бишкекте жол кырсыгына себепкер милиционер мас абалында болушу мүмкүн

БИШКЕК, 16-янв. — Sputnik. Бишкекте 16-январь күнү саат 10:50дө милиционер Тыныстанов менен Москва көчөлөрүнүн кесилишинде жол кырсыгына кабылды. Бул тууралуу Sputnik Кыргызстан маалымат агенттигине окуянын каарманы Эсен Якубжанов билдирди.

Анын айтымында, жол кырсыктын күнөөкөрү өзүн милиция кызматкери катары тааныштырып айдоочулук күбөлүгүн таштап кеткен.

Якубжановдун айтып бергени боюнча ал Тыныстанов көчөсү менен түштүктү көздөй кара түстөгү Honda Odyssey үлгүсүндөгү унаасы менен кетип бараткан. Ал Москва көчөсүнөн жаңы эле өткөндө ошол эле үлгүдөгү ак түстөгү унаа коюп кеткен.

Бишкекте мас милиционер жол кырсыгына кабылды. Кырсыктан кийинки видео

6 Үчтүн айы 2018, 21:52

"Анын унаасы түз жолдо эле кыйшалаңдап жүрүп баратты. Экөөбүз теңелип калганда эмнегедир рулду шарт эле мен тарапка буруп жиберди. Натыйжада унаамдын сол тарабы жабыркады. Машинанын ичинен мас абалындагы киши чыкты. Ал "милиция кызматкеримин" деп күбөлүгүн көрсөткөнү менен окуганга берген жок. Унааны оңдотууга акча сурасам банктык картасын сунду. Мен аны алуудан баш тартып койсом, айдоочулук күбөлүгүн берди. Кийин мени өзү таап машинаны оңдотуп берүүгө сөз берди", — деди Якубжанов.

Окуя болгон жерге Жол кыймылы коопсуздугун камсыздоо башкармалыгынын кызматкерлери барып протокол түзүштү. Милиция айдоочулук күбөлүктөгү маалыматтарды текшергенде, ак түстөгү Honda Odyssey унаасынын ээси мурда Октябрь райондук ИИБде иштегени, азыр ИИМдин кызматкери экени аныкталган. Учурда ал изделип жатат.