БИШКЕК, 15-янв. — Sputnik. Узаган аптада муз жарылып көлмөгө түшүп кеткен улакты кыш чилдесине карабай сууга түшүп алып чыккан чабандес, Шымкентте эки жаштын тоюна арналып хан сарайдын формасында жасалган чоң көлөмдүү торт соцтармакта кызуу талкууга алынды. Sputnik Кыргызстан агенттиги ушул жана башка окуялардын сүрөт, видео топтомун сунуштайт.
1. Бийчи апа. Кадимки тойдогу кызыктардын бири. Бул апага бий жарышта эч ким тең келе албай койду. Жашы өтүп калганына карабай ийилчү жерден ийилип катуу бийлептир.
2. Астанадагы борошо. 11-январда Астанадагы бороон-чапкындан улам аэропорт жабылып, бир нече райондордо жарык берүү үзгүлтүккө учурады. Шаар ичиндеги каттамдар дагы токтотулуп, өзгөчө кырдаал киргизилди.
3. Аламан улактын кумары. Улакчы жигиттин музду жарып шыргалаң суудан торпокту алып чыккан видеосу интернетте кызуу талкууга алынды. Анда муз кокусунан жарылып, чабандестер тартып жаткан торпок сууга түшүп кеткен. Күндүн сууктугуна карабай Куттубек аттуу улакчы сырткы кийимин чечип, торпокту суу алдынан таап алып чыккан. Той ээси анын эрдигин баалап, кой белек кылганы белгилүү болду. Улак Бишкектин "Ак-Бата" конушунда өткөн.
4. Оозду ачырган торт. Социалдык тармактарда тойго алып келинген чоң көлөмдөгү торт кызуу талкууланып жатат. Мындай торт Шымкенттеги үлпөт тойдо эки жашка арналып жасалган. Аны россиялык белгилүү кулинар Ренат Агзамов даярдаган. Торттун үстүндөгү эки жаштын куурчагы ат араба менен келет да, хан сарайга кирип лифт менен экинчи кабатка көтөрүлүп балкондон кол булгалайт экен. Казакстандык ЖМКлардын билдиришинче торттун баасы 179 миң долларды түзгөн.
5. Кайраттын күйөрмандары. Интернетте топ жарган ырчы Кайрат Кыргыздын фанаттары көбөйүп жатканы байкалууда. Мында аны туурап чыккан балдардын видеосу топтолгон. Алар Кайрат кыргыздын кийген кийими, чачы, кашы жада калса сакалына чейин окшоштурушкан.
6. Голливуддагы кара жорго. "Майкл Жексон" баштаган чет элдиктер Голливудда кара жорго бийледи. Аталган видеону Солто Эсенгулов аттуу Instagram колдонуучу баракчасына жүктөгөн. Анда ал "муну менен америкалыктарга улуттук баш кийим калпагыбызды жана музыкабызды ошондой эле элдин жана расалардын достугун көрсөткүм келди", деп жазган.