Жол кырсыгы 13-январда болжол менен саат 22:50лөр чамасында болгон. 6-кичирайон менен 11-кичирайондун ортосундагы Куттубаев көчөсүндө эки автоунаа кагышкан.
Жол кырсыгына катышкан айдоочунун айтымында, Hyundai Getz Куттубаев көчөсү менен чыгышты карай кетип бараткан. Видеодо көрүнгөдөй ага каршы тилкеде капысынан пайда болгон BMW автоунаасы келип урунган.
"Hyundai Getz автоунаасынын жүргүнчүсү жабыркады. Ал башы менен алдыңкы терезени сүзгөн учур видеого жазылып калган. Менин машинамды да жөөлөп кетишти. Бамперим сынды. BWM автоунаасын мас абалындагы жапжаш бала айдап жүрүптүр. Кызы менен бир жакка бараткан окшойт. Бизден кечирим да сураган жок. Кийин машинаны башка бирөө айдап бараткан дей баштады", — деди жабырлануучу.
Анын айтымында, жол кырсыгынын күнөөкөрү делген жаш бала медициналык текшерүү учурунда пива ичкени далилденген.
Үч машина тең айып короого токтотулду.
Жол кыймылы коопсуздугун көзөмөлдөө башкы башкармалыгы кырсык болгонун тастыктады.