БИШКЕК, 9-янв. — Sputnik. Түштүк Кореяда өтө турган кышкы Олимпиадага Кыргызстандын атынан биатлончу Тариаэл Жаркымбаев бара турган болду. Бул тууралуу Sputnik Кыргызстан агенттигине лыжа спорту боюнча федерациянын президенти Игорь Борисов билдирди.
Буга чейин Олимпиадага Кыргызстандан эки спортчунун бараары маалым болгон. Анын бири жолдомо утуп алган лыжачы Евгений Тимофеев болсо, экинчисинин аты-жөнү тактала элек болчу.
"Жаркымбаевдин талапкерлигин колдогон кат өткөн жумада келди. Биздин спортчу 1,6 чакырым аралыкта күч сынашат", — деди Борисов.
XXIII кышкы Олимпиада 2018-жылдын 9-25-февраль аралыгында Түштүк Кореянын Пхёнчхан шаарында өтөт. Биатлон боюнча таймаш 10-февралда Альпензия курортунда жайгашкан "Альпензия" борборунда башталып, 23-февралга чейин уланат. Мелдештин алкагында 11 комплект медаль ойнотулат.