БИШКЕК, 7-янв. — Sputnik. Түндүк Кореянын лидери Ким Чен Ын Түштүк Корея менен мамилени жөнгө салуу үчүн шарт түзүүгө чакырды. Бул тууралуу РИА Новости агенттиги Кореянын Борбордук телеграф агенттигине таянуу менен билдирди.
"Түндүк менен Түштүктүн мамилесине буга чейин болгон окуялар таасир бербеши керек. Эки жактын мамилесин жакшыртып, кошулуу жаатында иштерди илгерилетиш керек", — деп жазылат маалыматта.
Ошондой эле бул жерде Пхеньян менен Сеулдун мамилесин жөнгө салуу жөнүндө гана сөз болбостон, улуттардын элдешүүсү боюнча дагы кеп болуп жатканы айтылат.
Буга чейин эки Корея көп убакыттан бери биринчи жолу атайын канал аркылуу сүйлөшүп, анын ичинде Түндүк Кореянын спортчуларын Пхенчханда боло турчу Кышкы олимпиада оюндарына катыштыруу маселеси талкууланган.
Өз кезегинде АКШ президенти Дональд Трамп Сеул менен Пхеньяндын сүйлөшүүсүн колдой турганын билдирген. Ал ошондой эле эки мамлекеттин жакындашуу аракетине АКШдагы кийлигишүүсү мүмкүндүгүн айткан.