БИШКЕК, 5-янв. — Sputnik. Чоңдорго чапан жабуу адатынан арылуу керек деген пикирин маданият, маалымат жана туризм министри Султан Жумагулов билдирди.
Министрликтин басма сөз кызматы билдиргендей, Жумагуловдун мындай кайрылуу жасоосуна маданият мекемелеринин биринин жетекчилиги министрди жаңы жылы менен куттуктап, үстүнө кийит жапканы себеп болгон.
"Кесир болбосун, бирок чоңдорго чапан жапкан адаттан арылалы. Бакай калпак менен кементайды карылык доорун сүрүп жаткан карыяларга жабат. Экинчиден, бул кийитке акча кетти. А сиздер "айлыгыбыз аз, көтөрүп бергиле" деп өкмөттүн каалгасын жыртып келе жатасыздар. Биз, маданият адамдары, башкаларга үлгү болушубуз керек", — деди Жумагулов кайрылуусунда.
Андан көрө министр ага системаны оңдоо тууралуу алгылыктуу идеялар менен келүүсүн суранды.