БИШКЕК, 5-янв. — Sputnik. Кыргызстанда дагы 275 орто мектептин окуучуларына ысык тамак бериле баштайт. Тийиштүү токтомго премьер-министр Сапар Исаков кол койду.
"Кабыл алынган документке ылайык, 275 мектептин 1-4-классынын окуучулары ысык тамак менен камсыз болуп, окуучулардын санына жараша ашпозчулардын саны дагы көбөйөт", — деп айталат билдирүүдө.
Учурда өлкө аймагындагы орто мектептерде 1-4-класстын окуучуларына нан азыктары менен чай, компот же сүт берилет.
Ал эми 2014-жылдан бери өкмөттүн токтомуна ылайык, бир нече мектеп окуучуларга ысык тамак бере баштаган. Ал жылы 134 мектептин окуучулары ысык тамак иче баштаса, 2015-жылы мындай мектептердин саны дагы 331ге көбөйтүлгөн. Эми алардын катарын 275 орто билим берүү мекемелери толуктамай болду.