Бишкек, 5-окт. — Sputnik. Түркия аскерлери "Евфрат калканы" операциясы учурунда Сириянын түндүгүндө 18 террорчуну жок кылып, өзүнүн бир кызматкеринен ажырады. Бул тууралуу РИА Новости кабарлады.
Аталган операция учурунда дагы үч аскер кызматкери жарадар болгондугун Түркиянын куралдуу күчтөрүнүн Башкы штабынан билдиришти.
Башкы штабдын маалыматында оппозициядагы Сириянын эркин армиясы аталган өлкөнүн түндүгүндөгү 980 чарчы чакырым жерге көзөмөл кылат.
Аталган операция август айында эле башталып, "Ислам мамлекети" террордук тобуна каршы багытталган. Сирия оппозициясы менен биргеликте чек арада жайгашкан Жараблус шаарын көзөмөлгө алган. Ал эми Сириядагы күрддөрдүн өкүлдөрү бул иш-аракеттер агрессиялуу маанайда болуп, биринчи кезекте аларга багытталаган деп билдирген.
