БИШКЕК, 19-июл. — Sputnik. Түркиянын президенти Режеп Тайип Эрдоган бийликти басып алууга аракет болгон маалда Мармаристеги мейманканада 10-15 мүнөт дагы калганда өлүп калышы ыктымалдыгын айтты. Бул тууралуу РИА Новости CNN телеканалына шилтеме берүү менен билдирди.
"Мармаристе мага каршы операциялар жүрдү. Эки жан сакчымды өлтүрүштү. Эгер мейманканада дагы 10-15 мүнөт калганда мени өлтүрүп, же туткунга алышмак", — деп телеканалга билдирген.
Эрдоган Мармаристе үй-бүлөсү менен эс алганын айтты.
"Беш күнгө эмгек өргүүсүнө чыкканбыз. Болжол менен кечки саат ондордо мага Анкарада, Стамбулда жана башка шаарларда болуп жаткан аракеттер жөнүндө кабар беришти. Андан кийин мен телефон аркылуу калкка көчөгө чыккыла деп кайрылууга туура келди", — деди Эрдоган.
Белгилей кетсек, Түркиянын аскерлери 16-июлдун түнүндө бийликти күч менен тартып алууга аракет кылган, бирок алардын аракети ишке ашпай калганын бийлик билдирген. Мындай аракеттин кесепетинен акыркы маалыматтар боюнча 265 киши каза болгон. Анын ичинен 104ү козголоңчулар.
