БИШКЕК, 27-май — Sputnik. Жастин Кастелланос аттуу аскер кызматкери бул жылдын март айында Окинавада япон кызын зордуктаганын сот учурунда мойнуна алды. Бул туурасында РИА Новости жазды.
Марттын ортосунда Кэмп Шваб деп аталган америкалык аскер базасынын аскери Окинава аймагына келген япониялык турист кызды зордуктоого шектелип кармалган. Бул чоң чуу эл аралык мамилелерге таасирин тийгизип, Күн Чыгыш мамлекети АКШга нота жолдогон.
Бүгүн аталган иш боюнча биринчи соттук жараян өтүп, Жастин Кастелланос мейманканага токтогон япондук турист кызды зордуктаганын мойнуна алды.
"Ал коридордо уктап калыптыр. Аны жулкулдатсам, ойгонгон жок. Ушундан кийин оюм бузулду…", — деп Кастелланостун айткандыгын Киодо агенттиги жазды.
Сот Окинаванын жашоочуларынын америкалык Кадэна аскерий базанын аскери Шинзато Кеннет 20 жаштагы япон кызынын өлүмүнө тиешеси бар экендиги белгилүү болгондон кийинки күчөп кеткен нааразычылыктарынын фонунда өтүп жатат.
Тергөөнүн жүрүшүндө ал кызды көчөдөн аңдып барып, эсин оодара чаап, зордуктап, андан соң өлтүрүп салгандыгы белгилүү болгон.
