ЕРЕВАН, 20-май – Sputnik. Армениянын президенти Серж Саргсян Евразиялык экономикалык биримдикке мүчө мамлекеттердин өкмөт башчылары менен жолукту.
Эскерте кетсек, учурда Армениянын борбор калаасы Ереван шаарында Евразиялык экономикалык биримдикке кирген мамлекеттердин өкмөт аралык кеңешинин жыйыны өтүп жатат.
Президент Саргсян премьер-министрлерди көрүп жатканына куштар экенин белгилеп, кеңештин ишине ийгилик каалады. Ал мындай жыйындар ЕАЭБ алкагындагы өлкөлөрдүн ортосундагы экономикалык, маданий жана гуманитардык мамилелерди бекемдөөгө өбөлгө болорун айтты.
Буга чейин кыргызстандык делегацияны жетектеп барган премьер-министр Сооронбай Жээнбеков казак кесиптеши Карим Масимов менен жолугуп, Кыргызстандан Казакстанга өткөрүүгө убактылуу тыюу салынган картошка маселесин талкуулады.
