БИШКЕК, 10-апр. — Sputnik. Стамбулда болгон жарылуудан кыргызстандыктар жабыр тарткан жок. Бул тууралуу КРдин Стамбулдагы консулу Руслан Молдакунов Sputnik Кыргызстан маалымат агенттигине билдирди.
Ишемби күнү, 9-апрелде Межидиекөй аймагындагы жер алдындагы өтмөктө жарылуу болуп, үч киши жеңил жаракат алганын Sputnik Türkiye маалымат агенттиги билдирди.
Ушул эле күнү Стамбулдун Эйүп, Алибейкөй Карадолап аймагында да жарылуу болгон.
Окуя болгон жерге келген полиция жарылуу канализациядагы метандан улам болгонун аныктаган. Анын кесепетинен үч киши жеңил жаракат алган.
Мындан тышкары, Стамбулдун Таксим аянтындагы трамвай бекетинде шектүү баштык табылып, ал элди ызы-чууга алып келген. Шектүү баштыкты саперлер жеринде жардырган. Анын ичинен кийимдер чыккан.
Белгилей кетсек, буга чейин Түркиянын аймагынан бир нече жолу жардыруулар болгон.
