БИШКЕК, 9-мар. — Sputnik. Түркиянын Birgün гезитинин журналисти Барыш Инже президент Тайип Эрдоганга акарат келтирип жазган макаласы үчүн 21 айга кесилгенин басылма билдирди.
Инже Түркиядагы коррупциялык иштерге жогорку мамлекеттик кызмат адамдарынын катыштыгы бар экени жөнүндө макаласын 2013-жылы декабрда жарыялаган. Анын макаласынын айрым бөлүгүндөгү текстин баш тамгалары "Тайип – ууру" деп белгиленген. Бирок, журналист муну дал келүүчүлүк катары айткан. Ага Эрдоганга акарат келтирген деп айып тагылган.
Буга чейин Түркиянын юстиция министри Бекир Боздаг өлкөнүн 1845 жаранына Эрдоганга акарат келтирген деп тергөө иштери жүрүп жатканын маалымдаган.
Түркиянын мыйзамдарына ылайык, президентти жаманатты кылып, ага сөз тийгизгендерге акчалай айып салынат же бир жылдан төрт жылга чейин абакка кесилет. Оппозиция мындай ыкма менен бийлик алардын саясатына макул болбогондорду "жок кылууда" деп айыптап келет.
