БИШКЕК, 4-мар. — Sputnik. "Ислам мамлекети" террористтик тобунун согушкерлери жакын арада Европа аймагында терактыларды жасоого белсенип жатканын АКШнын мамлекеттик департаменти бейшемби күнкү эскертүүсүндө билдирди.
Анда ИМ жана "Аль-Каида" сыяктуу топтордун чабуулу тууралуу маалымат негиздүү экени айтылган.
"Террористтик топтор Европа аймагына сокку урууну пландаштырып жатат. Европанын дээрлик бардык мамлекеттери эл аралык террористтик уюмдардын чабуулуна тушугушу мүмкүн", — деп айтылат эскертүүдө.
Документте экстремисттер ири спорттук иш-чараларды, театрларды, ачык базарларды, авиациялык кызматтарды, унаа системасы жана коомдук жайларды бутага алганы белгиленген.
"Бийлик Сирия менен Ирактан ИМге кирген европалыктар өз мекенине кайтып келип жаткандыктан, Европада болчу терактылардын учугу үзүлбөйт", — дейт департамент.
Эскертүүдө терактылар башка аймакта, негизинен Жакынкы Чыгышта да болушу мүмкүндүгүн айтылат.
