БИШКЕК, 6-янв. — Sputnik. Түндүк Корея өзөктүк куралдардын бири — суутек бомбасын сынады. Бул туурасында борбордук телеканал аркылуу бийлик атайын билдирүү жасап, кабарлашты.
Эфирден кеткен бул маалыматты Түштүк Кореянын бардык телеканалдары алып көрсөтүштү.
Буга чейин Түштүк Кореянын коопсуздук кеңеши менен Япония Түндүк Кореяда болгон шектүү жер титирөөдөн улам, шашылыш түрдө жыйын чакырган.
Түндүк Корея өзүн өзөктүк куралы бар держава деп жарыялагандан бери өзөктүк куралды төртүнчү ирет сыноодон өткөрүп жатат. Рёнхап агенттигинин маалыматында, бул куралдар жердин алдында 100 метр тереңдикте жардырылган болушу мүмкүн. Термелүү бир топ аралыкта жайгашкан түштүк тараптагы Чеджудо аралында да сезилгендиги аталган агенттик кошумча билдирди.
