БИШКЕК, 25-ноя. — Sputnik. Су-24 экипажынын бир учкучу Сириянын үстүндөгү жерден ок атуудан абада курман болгонун РФ Аскердик аба күчтөрүнүн Башкы штабынын оперативдүү башкармалык жетекчиси Сергей Рудской билдирди.
Ракета Су-24 учагына Сириянын аймагында тийгени кабарланат. Учак чек арадан төрт чакырым аралыкта Сириянын аймагына кулаган.
"Учактын экипажы секирип кеткен. Алдын ала маалыматтар боюнча, учкучтардын бири жерден атылган октон курман болгон. Абадан атып түшүрүлгөн россиялык аскер учагынын экипажын издеп куткаруу боюнча операция уланып жатат", — деди Рудской.
РФтин Коргоо министрлигинин билдирүүсү боюнча, Ми-8 тик учагында куткаруу операциясына катышып жаткан деңиз жөө аскерлеринин бир жоокери да курман болгон.
Ошону менен катар АКШнын Мамлекеттик департаменти учактан секирген россиялык учкучтарга өзүн коргоого аракет кылган сириялык түркмөндөр ок чыгарышы мүмкүн деген божомолун айтат.
"Эгер түркмөн күчтөрүнө Россия абадан сокку урган болсо, алар өзүн коргоду болуш керек", — деди брифингде департаменттин расмий өкүлү Марк Тонер СУ-24төн секирген россиялык учкучтарга ок чыгарган сириялык түркмөндөрдүн аракеттерине баа берүү жөнүндөгү суроого жооп берип жатып.
30-сентябрда президент Башар Асаддын өтүнүчү менен Россия Сириядагы "Ислам мамлекети" жайгашкан жерлерге Су-25, Су-24М, Су-34, Су-30СМ бомбалоочу жана чабуул коюучу аскер учактары менен абадан даректүү сокку ура баштаган. Ноябрдын ортосунда Россиянын стратегиялык авиациясы — Ту-160, Ту-95МС жана Ту-22М3 учактарын да колдонууга киргизген.
