БИШКЕК, 26-окт. — Sputnik. Түркиянын Анталья шаарында жол кырсыгына кабылган беш кыргызстандык жарандын бирөөсү Арслан Кулов реанимацияда экенин КР Тышкы иштер министрлиги Стамбулдагы консулдукка шилтеме берүү менен билдирди.
Маалыматка ылайык, кырсык болгон жерге келген "тез жардам" кызматы Дастан Бектеновго, Тилек уулу Бекзатка жана Мирбек Сураналиевге алгачкы медициналык жардам көрсөтүп, коё беришкен. Ал эми Бакытбек уулу Бекбол менен Арслан Кулов Анталья шаарындагы "Яшам" ооруканасына жеткирилген.
Башкы консулдуктун маалыматы боюнча кыргызстандыктар "Симена Сан Клаб" мейманканасында иштеп келишкен. 26-октябрда алардын эмгек келишими аягына чыкмак. Алар 24-октябрда кетээр алдында Антальяда соода кылуу үчүн автобус менен жолго чыгышкан. Айдоочу рулду башкара албай, унаа жолдон чыгып кеткен.
Башкы консул менен сүйлөшкөн аталган отелдин өкүлдөрү Бакытбек уулу Бекбол менен Арслан Куловдун дарыланууга кеткен чыгымдарын өздөрүнө алууга макул болушкан. Ошондой эле, аларды мекенине жөнөтүү милдетин да моюндашкан.
