БИШКЕК, 28-сен. — Sputnik. Кыргызстандан Сириядагы чыр-чатактуу аймактарга кеткендердин саны 300гө чукул, алардын ичинен 112и аялдар. Кагылышууларда 45 жараныбыздын өлгөндүгү туурасында маалыматтар бар деп билдирди ИИМдин 10-башкармалыгынын жетекчисинин орун басары Раим Салимов.
Салимов диний экстремисттик абалдын жана радикалдашуунун алдын алуу, терроризмге каршы күрөшүү боюнча ИИМ бир нече жагдайларды, анын ичинен мыйзамсыз диний окутууларды, дават ишмердүүлүгүн жана Кыргызстанга келген качкындарды көзөмөлгө алууну сунуштарын айтты.
Ал чет өлкөлөргө диний билим издейм деп кеткен Кыргызстандын жарандарын бир сыйра көзөмөлдөн өткөрүү зарылдыгын айтат.
"Биздин сунуш — чет мамлекеттердеги биздин элчиликтердин жардамы менен окуу жайларды изилдеп, андан кийин биздин жарандарга сунуш-жардам берүү. Биздеги маалымат боюнча көптөгөн диний аалымдар, лидерлер чет жактардагы диний окуу борборлору менен келишим түзүп, мамлекеттин кабары жок, биздин өспүрүмдөрдү ал жактарга жөнөтүшөт. Алар эртең экстремисттик жана террордук уюмдардын катарын толуктабайт деп эч ким кепилдик бере албайт", — деди Салимов.
ИИМ өкүлүнүн айтымында, Кыргызстанда дүйнөнүн башка өлкөлөрү сыяктуу эле бара-бара Сирия менен Ирактан баш паанек издегендерден сыртта калбайт.
"Мындай шартта качкындардын арасында экстремисттер, террорчулар болушу да мүмкүн. Ушушга байланыштуу эл аралык террордук уюмдун мүчөлөрүнүн бүт дүйнөгө таралып кетүү кооптуулугу турат. Бул маселеге биз да көңүл кош карабастан, бизге да качкындар келгенде, аларды текшерүүдөн тыкыр өткөрүү маселесин караш керек",— деди Салимов.
Кыргызстандын күч кызматтарынын маалыматында, Сирия, Ирактагы согушка өлкөнүн түштүк аймагынан кеткендердин саны арбын болууда.
Эмгек, миграция жана жаштар министрлигинин маалыматына караганда, 2015-жылдын сентябрына карата Кыргызстанга келген качкындардын саны 183 адамды түзөт. Анын ичинен биринчи орунда афганистандыктар (114 адам) турат. Калган 69 киши башка өлкөлөрдүн жарандары.
